"Səbail"də Ağayevlə Bardea da "ofsayd"a düşdü

“Səbail”də zədə epidemiyası davam edir. Klubun mətbuat xidmətinin rəhbəri Rəşad Məmmədovun Presssport.az-a verdiyi məlumata görə, qapıçı Səlahət Ağayevlə israilli mərkəz müdafiəçisi Nir Bardea Premyer Liqanın III dövrənin ilk turu çərçivəsində “Zirə”ylə bugünkü ev matçında oynamayacaqlar: “Onlar Antalyadakı qış təlim-məşq toplanışında yüngül zədə alıblar. Bu üzdən hazırlıq prosesindən kənarda qalıblar. İkinci dövrənin gedişində Türkiyədə əməliyyat olunmuş futbolçumuz Süleyman Əhmədov gələn həftədən məşqlərə başlayacaq. Digər əməliyyat olunan sağ cinah müdafiəçimiz Cabir Əmirli isə artıq məşqlərə start verib. Onun nə vaxt oynamasına baş məşqçi qərar verəcək”.

Xatırladaq ki, “Səbail”nin cinah yarımmüdafiəçiləri - kapitan Ağabala Ramazanovla fransalı David Qomis üçün cari mövsüm artıq başa çatıb.