Kata üzrə ilk dəfə ölkə birinciliyi keçirilib

Azərbaycan Cüdo Federasiyasının (ACF) təşkilatçılığı ilə ilk dəfə cüdo idman növündə kata üzrə 18 yaşa qədər yeniyetmələr arasında ölkə birinciliyi keçirilib. Presssport.az xəbər verir ki, yarışda 12 cütlük (Tori və Uke) medallar uğrunda mübarizə aparıb.

Yarış zamanı cüdoçular yalnız Katanın “Nage no Kata” növündə fəndləri nüməyiş etdirib.

Yarışda Türkiyə Cüdo Federasiyasının (TCF) Təhsil Direktoru, Avropa Cüdo Birliyinin (ACB) Kata Komissiyasının üzvü Mehmet Yılmaz və TCF-nın təhsil mütəxəssisi Gökhan Çelik də iştirak edib.

ACF-in icraçı vitse-prezidenti Rəşad Rəsullu kata üzrə ölkə birincilinin təltifetmə mərasimində çıxış edərək yarışda iştirak edən idmançılara uğurlar arzulayıb və qalib olan idmançıları təbrik edib. “Kata üzrə bu cür yarışların təşkil edilməsi, cüdo idman növünün daha əsaslı bir şəkildə inkişaf etməsinə zəmin yaradır. Son dövrlərdə Azərbaycan cüdoçularının beynəlxalq arenalarda göstərdikləri nəticələrlə yanaşı, Azərbaycan Cüdo Federasiyasının təhsillə əlaqədar fəaliyyəti, gələcəkdə Azərbaycan cüdosunda daha da yaxşı nəticələrin əldə edilməsinə töhfə verəcək".

Rəsullu yarışda iştirak edən idmançıların məşqçilərinin Beynəlxalq Cüdo Federasiyası (BCF) Akedemiyasının məzunları olmasını xüsusi qeyd edib: “Bu gün yarışa qatılan yeniyetmələrin məşqçilərinin hər biri BCF Akademiyasında məşqçilik sertifikatı proqramını uğurla başa vurub. Bu onu göstəricisidir ki, BCF Akademiyası ilə qurulmuş əməkdaşlıq əlaqələri öz nəticələrini verir".

Yılmaz Azərbaycan cüdosunda təhsil ilə bağlı həyata keçirilən fəaliyyətlərin mühüm rolunu vurğulayıb: “Azərbaycanda təhsil ilə bağlı həyata keçirilən fəaliyyətləri yaxından izləyirik. İnanırıq ki, bu sahədə görülən işlər Azərbaycan cüdosunun inkişafında mühüm rol oynayacaq və cüdoçuların gələcəkdə beynəlxalq arenalarda daha böyük uğurlar qazanmasını gətirib çıxaracaq".

Medalçıların siyahısını təqdim edirik:

Qızıl medal 
Sadiq Abdullayev (Tori) 
Rəcəb Əkbərov (Uke)

Gümüş medal 
Rəsul Əmirzadə (Tori) 
Elvin Məmmədov (Uke)

Bürünc medal 
Ayxan İslamlı (Tori) 
İsmayıl Rəhimli (Uke)

Bürünc medal 
Cavanşir Comərdov (Tori) 
Fazil Hüseynov (Uke)

5-ci yer 
İsa Allahverdiyev (Tori) 
Hüseyn Vəliyev (Uke)

5-ci yer 
Zidan Bəşirov (Tori) 
Tunar Cəfərov (Uke)