Ayaz Quliyev üçün düşərli may - 5 ildi bu anı gözləyirdi

Ayaz Quliyev debüt mövsümünü keçirdiyi Azərbaycan Premyer Liqasında qol hesabını açıb.

Presssport.az xəbər verir ki, bu, çıxış etdiyi “Sabah”da olub.

27 yaşlı yarımmüdafiəçi hesabat turu olan XXXIII turda “Araz-Naxçıvan”la Mərdəkandakı “Liv Bona Dea Arena”dakı matçın 2-ci dəqiqədə baxımlı qola imza atıb və bu, görüşdə yeganə qol olub.

Maraqlıdı ki, Ayaz futbolçu karyerasında növbəti qolu düz 5 il gözləməli olub. Özü də son qolunu da məhz may ayında vurması diqqət çəkir. Bu, yetirməsi olduğu, onu tanıdan Moskva “Spartak”ında olub. Bu, 2019-cu ilin mayın 18-də Rusiya Premyer Liqasında XXIX turda Samarada “Krılya Sovetov”la görüşdə olub. Quliyevin son saniyələrdə - 90+7-ci dəqiqədə vurduğu qol qələbə topu olub - 2:1. 

Onu da bildirək ki, Ayaz indiyədək çıxış etdiyi Rusiyanın müxtəlif liqalarında 167 oyunda cəmi 5 qol (3 assist) vurmuşdu. Yəni, bu, onun karyerasında 6-cı qolu olub. Əvəzində Quliyevin passivində 40 sarı, 1 qırmızı vərəqə var.