Abışov Berdıyevin yanında təcrübə keçir: "Ruslan hələ qərar verməyib ki, məşqçi olacaq, yoxsa funksioner"

Azərbaycan millisinin sabiq futbolçusu Ruslan Abışov Rusiyanın “Dinamo" klubunda təcrübə keçir. Bu barədə Presssport.az-a keçmiş müdafiəçinin qardaşı Sərxan İbrahimoğlu məlumat verib.

Belə ki, Ruslan Mahaçqala təmsilçisinin baş məşqçisi Kurban Berdıyevin yanında məşqçiliyin sirlərini öyrənir: "I Liqa komandası hazırda Türkiyənin Antalya şəhərində təlim-məşq toplanışındadı. Onlarda çempionat martda bərpa olunacaq. Bildiyiniz kimi, Ruslan vaxtilə Berdıyevin rəhbərliyi altında "Rubin"də çıxış edib. Onsuz da bu təcrübəli mütəxəssislə həmişə münasibətdə idik, Ruslanın onunla daim əlaqəsi vardı. Sağ olsun Berdıyev, Ruslan karyerasını qurtarandan sonra maraqlandı ki, gələcəyinlə bağlı nə fikrin var, neyləmək istəyirsən. Qardaşım da dedi ki, hələ müəyyənlənləşdirməmişəm. Sonradan elə məsləhət oldu ki, getsin onun yanına uzunmüddətli təcrübəyə. İnşallah, fevralın axırına kimi Berdıyevin yanındadı. Həmin vaxt "Dinamo" Türkiyədə hazırlıq prosesini başa vuraraq Mahaçqalaya dönəcək. Ruslan isə Bakıya bir neçə günlük qayıdaraq sonra artıq Dağıstan paytaxtına yollanacaq və yayadək orda qalacaq. Amma bu, işləmək yox, sırf tərcübə keçmək üçündü, belə məsləhət olunub".

Maraqlıdı, Ruslan gələcəkdə Berdıyevin yanında məqçiliyə başlaya bilərmi? Ən azı bu, müzakirə olunub?: "Bilirsiniz, Berdıyev elə adamdı ki, qapalı insandı. Bu üzdən indi nə fikirləşdiyini bilmirik. Hələ ki belə məsləhət olub ki, yanında təcrübə keçsin. Gələcəkdə hər şey ola bilər".

37 yaşlı Abışovun məşqçiliyə başlaması üçün lisenziya alması lazımdı. Millidə oynadığı üçün avtomatik C kateqoriyasına malikdi və oxumağa B-nı almaqla başlayacaq. Sərxanı dinləyək: "Əslində, belə bir plan var. Bu yöndə bəlli bir plan hazırlamışıq. AFFA-da B kursları fevralda başalyır. Sadəcə, Türkiyəyə səfərlə üst-üstə düşdü deyə bu dəfə qatıla bilməyəcək. Növbətisi avqustda olacaq. Yəqin, həmin vaxt gəlib B-ni oxuyacaq. Bir də ona görə hələ kateqoriyanı oxumur ki, məşqçi, yaxud funksioner olmaısyla bağlı yekun qərar verməyib. Avropada idarəetməklə bağlı bir neçə yaxşı seminar var ki, Ruslan ora da qatılmağı düşünür. Hələ ki Berdıyevin yanındadı, orda qərar vermək ona asan olacaq. Berdıyevin yanında məşqçilik Ruslana maraqlı gəlsə, bu sahədə işləməklə bağlı qərar verəcək. Yox, başqa yolu seçəcək. Böyük ehtimal avqustda B-ni oxuyacaq". 

Qeyd edək ki, Abışov 2013-cü ilin fevralından 2014-cü ilin yayına qədər “Rubin”də çıxış edib.