"Araz-Naxçıvan"ın məşqçisindən qələbə şərhi: "Nöqsanlarımız çoxdu, fasilə xeyrimizə olacaq"

"Araz-Naxçıvan" Misli Premyer Liqasının V turunda səfərdə "Sumqayıt"ı 1:0 hesabı ilə məğlub edib.

Presssport.az xəbər verir ki, Muxtar Respublika təmsilçisinin məşqçisi Rasim Ramaldanov matçdan sonra keçirilən mətbuat konfransında ilk olaraq qələbəni şərh edib. 

- Sumqayıtda oynamaq həmişə xoşdu. Dinamik və hücum futbolu oldu. Futbolçularımıza təşəkkür edirəm, yaxşı oynadılar. Qoldan sonra bir az geriyə çəkildik. Bəzi şeylər alınmırdı. Amma qələbə həmişə yaxşıdı.

- Hesabda önə keçəndən sonra sanki komanda arxayınlaşır. Bunun səbəbi nədi?

- Bu, bizə siqnal oldu. Komanda qol vurandan sonra müdafiəyə “oturur”. Vaxtımız var. Bunun üzərində işləyəcəyik. Qoldan sonra da dinamik futbol oynamağa çalışacağıq.

- Milli fasilə komandaya necə təsir edəcək?

- Yaxşı və ya pis olacağı bilinmir. Nöqsanlarımız çoxdu. Yeni oyunçular bir-birinə uyğunlaşmayıb. Çalışacağıq ki, nöqsanları aradan qaldıraq. Fasilə bxeyrimizə olacaq.

- Qarşınıza hansı hədəf qoyulub?

- Konkret hədəf qoymayıblar. Amma bacardığımızın ən yaxşısını etmək istəyirik. Avrokuboklara vəsiqə alınsa, lap yaxşı olar. Alınmasa da, yolumuza davam edəcəyik.