Abasov ağlını yerində oturtmaq üçün "dubl"a göndərdiyi legionerdən, onları xallardan edən hakimdən danışdı: "Neftçi"yə qarşı oyunda niyə motivasiyalı olmalı deyiləm?"

"Bir az məyusuq. O da itirdiyimiz xallara görədir. Ardıcıl məğlubiyyətlərdən sonra səfərdə qələbə qazana bilərdik. Bu da yenidən ayağa qalxmaq üçün stimul olardı. Referiden xoşum gəlmədi. Onun qərarları bizi xallardan etdi. Yanılmıram. Dəfələrlə epizodlara baxdım. Roy Kehatın epizodunda təmiz penalti verilmədi. Son nöqtələrdə keyfiyyət məsələsinə görə xallardan olduq. "Neftçi" kimi komanda ilə görüşdə epizodlar da olur qapında. Biz də epizodlar əldə etdik. Son olaraq, futbolçunun üzərinə düşən rahatçılıq var idi. Orada axsadıq. Bu, bizim üçün başlanğıcdır. Faciə yoxdur. Öz gücümüzə inanırıq. Azarkeşlərimizə təşəkkür edirəm. Xallar itirmişdik, oyunlar da ruhsuz oyunlar idi. Məşqçilər də və futbolçular da ruhsuz idi. Amma azarkeşlərimiz bizimlə birlikdə oldu. İstəyirdim ki, qalib gələk. Əfsuslar olsun ki, olmadı. Ən yaxşısına çalışacağıq. Söz verirəm".

Presssport.az xəbər verir ki, bu sözləri "Sumqayıt"ın baş məşqçisi Samir Abasov Misli Premyer Liqasının VIII turunun "Neftçi" ilə oyundan sonra keçirilmiş mətbuat konfransında deyib.

O, ardından jurnalistlərin suallarını cavablandırıb.

- Azarkeşlərlə nələr müzakirə olundu?

- Sırf mənimlə görüşməyə gəlmişdilər. Mənə dəstək olmuşdular. Yazıları görürlər, motivasiyamın düşdüyünü hiss edirlər, bilmirəm. Dedilər ki, şəhər olaraq yanındayıq. Nə olursa-olsun. Bunu hiss etmək hər məşqçiyə lazımdır.

- Cordan Rezabala Rəhimdən daha inamlı görünürdü. Rəhim oynamaq istəmir sanki...

- Rezabala çox yaxşı oynadı. Tək o yox, hamısı yaxşı performans göstərdi. Rəhimə də inamım sonsuzdur. Bu periodu da keçəcək. Rəhimin keyfiyyəti, bacarığı var. Onun "minusu" var, özünə də demişəm, öz ab-havasından çıxmağa çalışmır. Öz oynadığı futbolu üstün sayır. Rəhimi də yola gətirəcəyik, ona inanırıq. Ehtiyatdan girməsi sırf Rəhim və Rövlan üçün atılan addım idi. Bəzi oyunçuların kənardan matça baxmağa ehtiyacı var. 

- Komanda bir xala görə razıdır, siz itirlən xallara görə narazı?

- Futbolçuların üzüntələrini görürəm. Bizdə fiziki baxımdan dizbalans var. Hamısı düzələcək. Hər şey yaxşı olacaq. Hamısı optimal vəziyyətə gələcək. Alan Dias bir ilə yaxındır futbol oynamır. 

- Ötən oyundan sonra demişdiz ki, "futbolçularda şişmə var". Bugünkü nəticəni o işin üstünə düşdüyünüzə görə oldu, yoxsa sizin sırf motivasiyanız "Neftçi"yə qarşı idi?

- Bəziləri ilə ciddi danışdıq. Tresor Mossini əvəzedici heyətə göndərdik,. Məqsəd ağıllarını yerinə oturtmaq idi. Bizə ən çox motivasiyanı verən azarkeş idi. "Neftçi"yə qarşı oyunda niyə motivasiyalı olmalı deyiləm? Hamımız olmalıyıq.

- "Neftçi" və "Sumqayıt" bu mövsüm istəniləni vermir. Qarşıdakı dövrədə "Neftçi"-"Sumqayıt" görüşü möhtəşəm səviyyədə geri dönəcək?

- Epizodlarımız var idi. Ən azından yarı faizini qola çevirsəydik, rahat danışardım. Böyükhesablı qələbə qazana bilərdik. Amma uduzmaq da mümkün idi. Futbolçuların göstərdiyi ruhu gördüm, bəyəndim. Bizdə bu çatışmırdı, bütün oyunlara köklənməliyik.

- Növbəti matç "Qarabağ"a qarşıdır. Sizin planlarınızda hansısa dəyişiklik ola bilər?

- Heç nə gözləməyəcəyik. Uduzmağı da göz qabağına alıb bəzi şeylər etməliyik. Çünki axırı daha pis ola bilər. Əsas olan ruhumuzu qaytarmalıyıq. Bizi bu cür oyuna görə tanıyırlar. Biz çox "klass"la görünən komanda deyilik. Komandamız oyuna çıxanda oynamaq istəmir. İnsanlar bizi bu cür tənqid edirdi. Bu da haqlıdır. Qışa qədər komandanı yerinə oturtmalıyıq.

- "Neftçi" bir xal qazanaraq autsayderlər sırasından çıxdı. Autsayderlər qrupunda yer alan "Neftçi"yə qarşı oynamaq necə hiss idi?

- İki autsayder oynayırdı. "Neftçi" haqda danışa bilmərəm. İxtiyarımda deyil. Öz oyunumuzu qaytarmaq istəyirik. İki komanda da yaxşı günlərini yaşamır. Bizə uğurlar.

- Qara Qarayevlə danışıq aparmısız? "Sumqayıt"a lazımdır bu futbolçu?

- Qara Qarayev hər bir kluba lazımlı futbolçudur. Hər klubun öz siyasəti, işi var. O qərarlara qarışa bilmərik. Qara ilə danışmamışıq. Mənim komandamda olsa, çox sevinərəm.

- Samir Abasovla klub prezidenti arasında narazılıq var? 

- Xeyr.