Millimiz təlim-məşq toplanışına başlayıb

Azərbaycan milli komandası UEFA Millətlər Liqası çərçivəsində Estoniya və Slovakiya yığmalarına qarşı oyunlar üçün təlim-məşq toplanışına başlayıb.

Presssport.az xəbər verir ki, Fernandu Santuşun komandasının hazırlıq prosesi bu gün start götürüb. Millimiz 8-9 oktyabr tarixlərində Neftçi Futbol Mərkəzində məşq keçəcək. 

Komanda oktyabrın 9-da, saat 15:00-da Estoniyanın paytaxtı Tallinə yollanacaq. Baş məşqçi Fernandu Santuş millini oktyabrın 10-da, Bakı vaxtı ilə saat 18:00-da “Lilleküla” stadionunda Estoniya seçməsi ilə oyunöncəsi son məşqə çıxaracaq. Millimiz Estoniya yığması ilə görüşdən bir gün sonra – oktyabrın 12-də səhər məşqə çıxacaq, Bakı vaxtı ilə saat 14:00-da isə Bakıya qayıdacaq. Oktyabrın 13-də, saat 17:00-da Tofiq Bəhramov adına Respublika stadionunda Slovakiya yığması ilə oyunöncəsi son məşq olacaq.

Xatırladaq ki, millimiz C liqasının 1-ci qrupu çərçivəsində oktyabrın 11-də “Lilleküla” stadionunda Estoniya yığması ilə, oktyabrın 14-də isə Tofiq Bəhramov adına Respublika stadionunda Slovakiya seçməsi ilə qarşılaşacaq. Hər iki oyun eyni vaxtda – saat 20:00-da başlayacaq.