Ruqani Bakıda viza probleminə görə 3 saat hava limanında qalmalı olub: "Qarabağ" güclü komandadı, təhlükəli rəqibdi"

"Ayaks"ın futbolçusu Danieli Ruqani Avropa Liqası Liqa mərhələsinin III turunun "Qarabağ"la matçından öncə keçirilən mətbuat konfransında iştirak edib.

Presssport.az xəbər verir ki, italiyalı müdafiəçi jurnalistlərin suallarını cavablandırıb.

- “Qarabağ”ı necə xarakterizə edərdiniz?

- Onların oyunlarına baxmışıq. “Qarabağ”ı ciddi təhlil etmişik. Güclü komandadı, təhlükəli rəqibdir. "Qarabağ"ın Avropada böyük təcrübəsi var.

- Sabah bütün oyunu oynamağa hazırsınız?

- Bakıya qələbə üçün gəlmişik. Çətin olacaq, amma oynaya bildiyim üçün xoşbəxtəm. Ümid edirəm ki, komandaya nəticə əldə etməyə kömək edə biləcəm.

- Dünən hava limanında probleminiz olub?

- Elektron viza ilə bağlı problem yaranıb. Viza səhv doldurulub. Bakı hava limanında 3 saat qaldım.