Alfa Konte əsas heyətdə oynamağa layiq olduğunu sübut etdiyini açıqlayıb: "Məşqçi futbolçuya inananda uğur qazanmaq asan olur"

"Neftçi”nin afrikalı cinah hücumçusu Alfa Konte müsahibə verib.

Presssport.az həmin müsahibəni təqdim edir:

 - “Səbail”i 3:1 hesabı ilə məğlub etməklə “Neftçi” qələbə həsrətinə son qoydu. Qazanılan 3 xalı necə şərh edərdin?

- Yaxşı oyun sərgilədik. Qələbə qazanmağı çox istəyirdik. Əvvəlki matçlarda uğursuz çıxış edirdik. Buna son qoymaq lazım idi. Odur ki, “Səbail”lə matçda nə olur-olsun 3 xalı hədəfləyirdik. Hər şeyimizi meydanda verdik. Çox şadam ki, istəyimizə çatdıq.

- “Neftçi” buna qədər niyə belə oynamırdı?

- Futboldur bu. Əvvəl müəyyən çatışmazlıqlar var idi. “Səbail”lə matçda uğursuzluğa son qoyduq. İnanıram ki, bu qələbənin ardını qarşıdakı matçlarda da gətirəcəyik.

- Samir Abasovun gəlişi komandada nəyi dəyişib?

- Yeni baş məşqçi komanda hər bir futbolçuya inanır. Bunu meydanda da göstərdik.

- “Səbail”lə görüşdə ən yaxşılardan idin. Belədə avtomatik olaraq sual yaranır - niyə əvvəlki matçlarda səni meydanda görmürdük?

- Bilmirəm. Hər məşqçinin futbola baxışı müxtəlifdir. Yalnız onu deyə bilərəm ki, məşqçi futbolçuya inananda uğur qazanmaq asan olur.

- Deyə bilərikmi Alfa Konte əsas heyətdə oynamağa layiq olduğunu sübut etdi?

- Bəli (gülür).

- “Neftçi” artıq “qara zolaq”dan çıxdı, yoxsa hələ bunu demək üçün tezdir?

- İnanıram ki, pis günlər geridə qaldı. İlk qələbəni çox gözlədik. İndi artıq qələbələri sıralamalıyıq.

- Lakin növbəti turda səfərdə “Sabah”la qarşılaşacağınızı nəzərə alsaq, bu, heç də asan olmayacaq…

- Razıyam. “Sabah” yaxşı komandadır. Lakin biz nə olur-olsun meydana qələbə üçün çıxacağıq.

- Azarkeşlərə sözün…

- Onlar bizə hər zaman dəstək olurlar. Buna görə fanatlara təşəkkür edirəm. Növbəti matçlarda da azarkeşləri sevindirmək üçün əlimizdən gələni edəcəyik (futbolxeber.az).