Rəşad Sadıqov absurd qolla qələbəni əldən verdiklərini sayır: "Mənim də xeyrimə belə penalti verilməsini istəmərəm"

"Zirə" Misli Premyer Liqasının XI turunda səfərdə "Araz-Naxçıvan"la 1:1 hesablı heç-heçə edib.

Sportal.az xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandıraraq ilk olaraq qarşılaşmanı dəyərləndirib.

- Yüksək yerlər uğrunda mübarizə aparan iki komanda oynadı. Meydanda amansız mübarizə getdi. Hər iki komanda qələbə qazanmaq istəyirdi. Oyun bizim üçün yaxşı alınırdı. Fasilədən sonravəks-hücumlardan istifadə edib 2-ci qolu vura bilərdik. Amma olmadı. Xırda səhv nəticəyə təsir edə bilərdi. Sonda qapımıza zərbə olmadan penalti təyin edildi. Əlimizdən gələni etdik. Futbolçularımın mübarizəsindən razı qaldım. Hesab 1:1 olandan sonra da hücum edən tərəf idik. Təəssüf ki, qələbə qazana bilmədik. Səfərdə bu cür rəqiblə oyunda 1 xal da pis deyil.

- Fuad Bayramov oyun ərzində sizi narazı salırdı. Narazı qaldığınız hansı məqamlar idi?

- Mübarizə aparırdı, topla oyunda itkiləri var idi. Uzun müddətdir oynamırdı. Ola bilsin ki, oyun ritmindən düşüb. Amma istəkli idi. Sadəcə, topla daha yaxşı ola bilərdi.

- Penalti epizodunu necə şərh edərdiniz? Qərardan niyə narazı qaldınız?

• -Qaydaları dəqiq bilmirəm, ola bilər, qaydalarla penaltidi, haqlı qərardır. Mənim də xeyrimə belə penalti verilməsini istəmərəm. Ötürmə yoxdu. Futbolçu əlini yığışdırmağa çalışırdı. 

- Üç turdur ki, qələbə qazana bilmirsiz. Avrokuboklardan qalan yorğunluq səbəb ola bilər?

- Bu oyunları necə keçirmişik? "Turan Tovuz"un qapısı qarşısında 6 qol epizodumuz var idi. Bu gün qələbəyə daha yaxın tərəf biz idik. Sonda absurd qol buraxdıq. Sadəcə, bu turlarda bizimlə müqayisədə rəqiblər daha uğurludu. Rəqiblərimiz cərimə meydançasından dabanla qol vurur. 90-cı dəqiqədə qol buraxırıq. Bu tip hadisələri keçən mövsüm də yaşamışıq. Təcrübəmiz var, səbrli olmalıyıq. "Turan Tovuz"dan yaxşı oynadıq, "Sabah"la da başabaş mübarizə apardıq. Oyun baxımından problemimz yoxdu. Oyunumuzu inkişaf etdirməliyik.