Abasov bütün futbolçulara şans verəcək: "Onlar üçün indiki problem xal itirmək qorxusudu"

"Qalibiyyət üçün çıxmışdıq meydana. Artıq geriyə yolumuz da yoxdur. Hər oyuna da bu cür çıxacağıq. Bunun üçün hər şeyi etdikmi? Bu suallara komandanın içində aydınlıq gətirəcəyik. Nə lazımdırsa, onu da edəcəyik, bunun üzərində dayanayacağıq. Birinci hissədə yaxşı futbol oynamağa çalışırdıq. Bəzi epizodlarda sanki risk etməkdən, top itirməkdən çəkinirdik. Daha da qabağa getməkdən ehtiyatlanırdıq. Bəlkə də komandada bundan qabaq baş vermiş proseslərdəndir. Proses deyəndə ki, qalibiyyətsizlik, uduzmaqları nəzərdə tuturam. Yavaş-yavaş futbolçulara da dedim ki, belə psixoloji durumu bu oyunlarla aşa bilərik. Qalib gəlsəydik, daha yaxşı olardı. Bugünkü bir xala görə futbolçularımı təbrik edirəm. Güc sərf etdilər. Sizi əmin edirəm ki, bu deyilik, daha yaxşı olacağıq. İstəmirəm bu sözün üzərində dayanım ki, bizə zaman lazımdır. Çalışacağıq ki, tez edək".

Presssport.az xəbər verir ki, bu sözləri “Neftçi”nin baş məşqçisi Samir Abasov Misli Premyer Liqasının 11-ci turunun “Sabah”la oyunundan sonra mətbuat konfransında deyib.

O, ardından jurnalistlərin suallarını cavablandırıb.

- Ötən oyunun ən yaxşılarından olan Alfa Konte bu gün ehtiyatda qalmışdı. Sirr deyilsə, ikinci hissədə dönüş yaratmaq üçün saxlamışdınız onu, yoxsa məşqlərdə özünü göstərməmişdi?

- Heç biri. Əlimizdə 20-21 futbolçumuz var. Onlar arasında zədəlilər də az deyil. Futbolçuları bu cür komandada tonusda saxlamaq lazımdı. Mən gələnə qədər Lebon oynayırdı. Kim nəyə qadirdir, kim hansı komandaya qarşı nə edə bilər, bunlar mənim üçün də informasiya olmalıdır. Bütün futbolçuları yoxlamalı, oynatmalıyam. Bütün futbolçulardan razıyam, rotasiyalar olacaq. Hansısa futbolçu buradan gedəndə, mənə də sualları olacaq, insandır. Sual verə bilər ki, məni harada oynatdınız, hansı oyunda gördünüz... Bunlara da cavab tapmaq üçün onların hamısını yoxlamalıyıq. Hamısı eyni səviyyədə olan futbolçulardır. Bu cür komandalarda futbolçuları tonusda saxlamalıyıq.

- İkinci hissədəki sönük oyununuzun səbəbi fiziki cəhətdən yorğunluq idi?

- Fiziki durumdan danışmaq istəmirəm. Problemlər varsa, onları həll edəcəyik. Məşqlərdə tam başqa oluruq, oyunda tam başqa şeylərlə rastlaşdıq. Bayaq dediyim kimi, əsas məqam uduzmamaq, qol buraxmamaq məsələsi var. 

- Yəqin ki, təqvimə nəzər salmısınız. Qarşıdakı dörd ev oyununda neçə xal qazansanız bunu uğur sayarsınız?

- İndi elə durumdayıq ki, düşdüyümüz vəziyyət kritik idi. Yaxşı deyildi. Bu gün qalib gəlirsən, amma səndən irəlidə gedənlər də qalib gəlir. İndiki vəziyyətdə prioritetimiz onlara qaçıb çatmaq olacaqsa... Çox şeyləri edə bilməmək qorxusu da var. Bu gün penaltidən qol buraxsaydıq, ondan sonra tam psixoloji "ölməyimizə" səbəb olardı. Başqa yön seçmişik ki, hər oyuna məşqlərdə hazırlaşaq. 

- Yeqor Boqomolski haqda hansı fikirdəsiniz? Siz də ona şans verdiniz. Ümid edirsinizz ki, komandaya kömək edə bilər?

- Futbolçular oynadıqca tonusda qalmalıdı. Qarşıdakı oyunda kimsə sarı vərəqə ilə cəzalandırıla, başqasına ehtiyacımız ola bilər. Bu cür komandada hamını tonusda saxlamalısan. Futbolçuları tanımaq üçün oynatmalıyam. Məşqlərdə də onları görürəm. İndiyə qədər gördüyüm mənzərə odur ki, bütün futbolçularımdan razıyam.

- Emin Mahmudovun əvvəlki performansını görməyi üçün ona nə qədər vaxt lazımdır?

- Emin keçən oyunda da 90 dəqiqə oynadı. O, digər futbolçularımız kimi aparıcı üzvümüzdü. Eminin bugünkü gündə digər futbolçulardan mənim üçün üstün cəhəti onlardan futbolçu olaraq seçilməsi deyil, sadəcə, mənimlə işləyib, nə istədiyimi bilir. O rahatlığı Emində görürəm. Bunu meydanda digər futbolçulara da çatdıra bilər. Məşqlərdə də görürəm ki, Emin oynamaq üçün alışıb-yanır. Ondan da çox razıyam.

- Futbolçularınız məğlub libasını əyinlərindən tam söküb ata biliblər?

- Hələ yox. Bəzi futbolçularda bu, açıq-aşkar sezilir. Bəzi futbolçularda məşqdə və oyunda tam əksini görürsən. Qalibiyyət gəldikcə, hər şey öz yerinə “oturacaq”. Doqquz oyun udmamaq zarafat deyil. Əlbəttə ki, bu məqam futbolçulara psixoloji olaraq təsir edir. Yəni, "yenə uduzub haralara düşə bilərik" qorxusu var. Çalışırıq ki, birlikdə bunu aradan qaldıraq. "Sabah"la oyun bizim üçün çox önəmli idi. Düzdü, faciə baş verməyib. Amma ən azından bu psixoloji durumu pik nöqtəyə çatdırmaq üçün bu cür oyunları udmağa başlamalıyıq. Onlar da insandı, onlar üçün də çətindi. İndiki problem xal itirmək qorxusudu. Bunu aradan qaldırmalıyıq.

- Qapı mövqeyində rəqabət necədir? Təcrübəli, amma xeyli vaxtdı oynamayan Emil Balayevin hazırlıq durumu necədi və ona yaxın gələcəkdə şans verməyi düşünürsünüz?

- Emil zədədən çıxıb - özü də bir yox, iki. Onun üçün bərpa dövrüdü. Köməkçilərimlə tam hiss etsək ki, Emil psixoloji olaraq hazırdı, o da şans qazanacaq. Amma bu gün hamısına şans verək deyə, təhlükəyə də ata bilmərik. Futbolçular tam hazır olsun, digər matçlarda görəcəyik.