AFFA Misli Premyer Liqasındakı 4 klubu cərimələyib

AFFA İntizam Komitəsi Misli Premyer Liqasında çıxış edən 4 klubu cərimələyib.

Presssport.az milli assosiasiyanın rəsmi saytına istinadən xəbər verir ki, "Turan Tovuz" XI turda "Kəpəz"ə qalib gəldiyi (2:1) matçda 5 futbolçusu sarı vərəqə aldığı üçün 700 manat ödəyəcək.

Gəncə klubu da eyni sayda oyunçusu vərəqə gördüyünə görə həmin məbləğdə xərcə düşüb. 

Qurum "sarı-göylər"ə əlavə olaraq 500 manat cərimə də kəsib. Buna Dioqo Verdaskanın 2-ci sarı vərəqənı alaraq meydandan qovulması səbəb olub. Futbolçuya 1 oyunluq cəza tətbiq edilib.

"Səbail" və "Sumqayıt" da 700 manat cərimələnib. Buna səbəb odur ki, "gənclik şəhəri" təmsilçisinin qələbə qazandığı (1:0) görüşdə hər 2 komandanın 4 futbolçusu sarı vərəqə ilə cəzalandırılıb.