Qara Qarayev Elmar Baxşıyevin istəyilə "Araz-Naxçıvan"a qoşulub: "Düşünürəm ki, bu da maksimumuz deyil"

"Komandamı qələbə münasibəti ilə təbrik edirəm. Yolumuza davam edirik. Düşünürəm ki, bu da maksimumuz deyil. Oyun planında daha da artırmalıyıq".

Presssport.az xəbər verir ki, bu sözləri "Araz-Naxçıvan"ın baş məşqçisi Elmar Baxşıyev Misli Premyer Liqasının 12-ci turunun “Neftçi”yə səfərdə 1:0 hesabıyla qalib gəldikləri oyundan sonra keçirilmiş mətbuat konfransında deyib. O, ardından jurnalistlərin suallarını cavablandırıb.

- İlk yarıda dinamik, hücumameyilli oynasanız da ikinci hissədə bir az zəif göründüz. Hətta bir sıra dəyişikliklər də etdiniz. Amma bunun da nəticəsi olmadı.…

- Futbolda elə qanun yoxdur ki, əvəzetmədən meydana daxil olan futbolçu oyunu dəyişməlidir. Birinci hissədə zədələnən oyunçumuz oldu - Bəxtiyar Həsənalızadə. Ona uyğun da rotasiyaya getməyə məcbur qaldıq. Çünki həmin mövqedə yerli olmadığı üçün əcnəbi futbolçumuzu meydana buraxdıq. İkinci hissə birinci hissədən daha çox epizodlara girdik. Sadəcə, son nöqtəni qoya bilmədik.

- Qara Qarayev ehtiyat skamyada idi.  Onu niyə oynatmadız?

- Qaranın durumu hamıya bəllidir. İki gün öncə mənim istəyimlə komandaya qoşulub. Günlər keçdikcə Qara komandamıza fayda verəcək.

- Psixoloji, yoxsa fiziki cəhətdən hazır deyil?

- Psixoloji durumu qaydasındadır. Keçmişlə yaşayacağıqsa, gələcəyə heç vaxt ümid olmayacaq. Onu başa düşür. Qaraya hər bir dəstəyi verməyə hazırıq. Təcrübəli futbolçudu, yaxşı performansa çatacaq.

- Turan Vəlizadəyə göstərilən qırmızı vərəqəni haqlı sayırsız?

- İki sarı vərəqə ilə cəzalandırıldı. 

Gənc futbolçudu, onlarda emosiya daha artıq olur. İki oyun epizodu idi. Daha təmkinli olmalıdır. Ona ümumi irad yoxdur.