Toral Bayramov "Turan Tovuz"da olan ekstra istək və Norveçə qarşıdakı səfər haqda: "İnanıram ki, “Bodo Qlimt”lə matçda şanssızlıq olmaz...

"Qarabağ”ın müdafiəçisi Toral Bayramov müsahibə verib.

Presssport.az həmin müsahibəni təqdim edir:

 - “Turan Tovuz”la səfərdə heç-heçə (0:0) oynadınız. Bu nəticəni necə şərh edərdin?

- Çətin oyun olacağını bilirdik. Yaxşı hazırlaşmışdıq matça. Çempionat başlayandan yalnız bir məğlubiyyətimiz var. Onu da “Turan Tovuz”dan almışıq. Rəqib kollektiv şəkildə yaxşı mübarizə aparır.  - Qələbə qazanmaq üçün nə çatışmadı?

- Konkret bir söz deyə bilmərəm. Epizodları izləmək, oyunu analiz etmək lazımdır.

- Ardıcıl ikinci oyunda da “Turan Tovuz”u məğlub edə bilmədiniz. Bunun səbəbi nədir, niyə bu komandaya qarşı oyununuz istədiyiniz kimi alınmır?

- Deməzdim nəsə alınmır. Sadəcə bütün komandalar bizə qarşı xüsusi motivasiya ilə oynayırlar. “Turan Tovuz”da isə bu istək ekstradır. Pis oynamadıq. Fürsətlərdən yararlana bilmədik və bu da xal itkisinə gətirib çıxardı.

- Lakin rəqibin də şansları var idi, məğlub də ola bilərdiniz…

- Bəli, onların da qol fürsətləri var idi. Qapıçımız yaxşı oynadı. Ümumi götürdükdə heç-heçəni ədalətli nəticə sayıram.

- Qarşıdan “Bodo Qlimt”lə səfər oyunu gəlir. Həmin matçdan gözləntilərin?

- Rəqib haqda məlumatımız çox deyil. Artıq sabahdan həmin görüşə hazırlaşacağıq. Ümumi bilirik ki, yaxşı komandadır. Nəticələri də göz önündədir.

- “Turan Tovuz”la matçdakı xal itkisi Norveç səfəri öncəsi komandaya psixoloji cəhətdən mənfi təsir etməyəcək?

- Yox, bu futboldur. Bu gün olan bugündə də qalır. Biz Avropa Liqasında oynayırıqsa, bunları düşünməməliyik. Əlimizdən gələni edəcəyik ki, Norveç səfərində sərfəli nəticə qazanaq.

- UEFA Avropa Liqasında ardıcıl 3 məğlubiyyətdən sonra “Bodo Qlimt”lə matçı turnirdəki gələcək perspektiv baxımından son şans saymaq olar?

- 3 oyundan heç birində zəif oynamamışıq. Sadəcə sonluğu gətirə bilməmişik. İnanıram ki, “Bodo Qlimt”lə matçda şanssızlıq olmaz, yaratdığımız fürsətlərdən yararlanarıq. Hər oyuna qələbə üçün çıxırıq. Bu matç da istisna olmayacaq (futbolxeber.az).