Ayxan Abbasov qışda transferlər etməyi düşünür: "Güclənməyimizə ehtiyac var"

"Şamaxı" Misli Premyer Liqasının XII turunda doğma meydanda "Zirə"yə 0:2 hesabı ilə uduzub.

Presssport.az xəbər verir ki, bölgə təmsilçisinin baş məşqçisi Ayxan Abbasov oyundan sonra keçirilən mətbuat konfransında jurnalistlərin suallarını cavablandıraraq öncə görüşlə bağlı fikirlərini bölüşüb.

- Güclü rəqibə qarşı oynadıq. "Zirə" avrokubokların pley-off mərhələsində iştirak edib. Onlara qarşı oynamaq çətindir. Matça pis başlamadıq. İlk dəqiqələrdə epizodları dəyərləndirə bilmirik. Son nöqtəni qoymaqda çətinlik çəkirik. Rəqib bir səhvimizdən istifadə edib qol vurdu. İkinci hissədə yaxşı oynadıq. Amma nəticə bizi narahat edir. Çempionatın ilk dövrəsini yaxşı keçirdik. Zədələr, itkilər bizə təsir edir. Bunları bilirdik, indi əsas odur ki, ruhdan düşmək olmaz. Mübarizə sona qədər gedəcək. Qışa qədər daha çox xal yığmaq lazımdır.

- Noyabr ayı sizin üçün həlledici ola bilər?

- Çempionatda 10 komanda var, təqvim önəmlidir. "Neftçi" ilə oyundan sonra fasilə olacaq. Fasilədən sonra kritik oyunlar bizi gözləyir. Bizdən də üstün komandalar var ki, 4 oyundur qalib gələ bilmir.

- Qışda transferlər etməyi planlaşdırırsız?

- Əlbəttə, düşünürük. İkinci imkan önəmlidir. Güclənməyimizə ehtiyac var. Bəzi mövqelərdə rəqabət və alternativ yaratmaq lazımdır. Rəqiblərimiz hər gün dayanmır. Rəqabət var, təslim olmurlar. "Kəpəz" baş məşqçi dəyişikliyindən sonra 7 transfer edib. Bunlar bizim üçün siqnaldı.