Bədavi Hüseynov sabah ilk xallarını qazanacaqlarını inanır: "Mən də anlamıram ki, niyə..."

"Qarabağ"ın kapitanı Bədavi Hüseynov Avropa Liqası Liqa mərhələsinin IV turunun "Budo Qlimt"lə səfər matçından öncə keçirilən mətbuat konfransında iştirak edib.

Pressssport.az xəbər verir ki, 33 yaşlı mərkəz müdafiəçisinin öncə sabahkı matçdan gözləntisini açıqlayıb.

- Bizi sabah çox çətin oyun gözləyir. "Budo Qlimt" hücumda və müdafiədə balanslı komandadı. Anlayırıq ki, hazırda xalımız yoxdu. Çalışacağıq ki, sabah ilk xallarımızı qazanaq və vəziyyəti öz xeyrimizə düzəldək.

- Üç oyunda xal qazanmamağınızın səbəbi nədir?

- Mən də anlamıram. Hər dəfə daha yaxşı oyun nümayiş etdirməyə çalışırıq. Bəzən gözlənilməz hadisələr də baş verir. "Ayaks"la oyunda qırmızı vərəqə gedişatı dəyişdi. Eyni zamanda "Tottenhem"lə matça yaxşı başladıq. Əlimizə düşən qol vəziyyətlərindən istifadə edə bilmədik. Ümid edirəm ki, qarşıdakı oyunlarda vəziyyəti dəyişəcəyik.

- Süni örtükdə oynamaq sizin üçün problem olacaq?

- Süni oynamağa öyrəşməmişik. Həm ot örtüyü, həm də doğma azarkeşlərinin qarşısında oynamaq "Budo Qlimt" üçün üstünlük olacaq. Onların "Portu"ya qarşı oyununu izləmişik. Təbii ki, rəqibin zəif cəhətləri var. Necə olacağını sabah görəcəyik.