Riad Rəfiyev idman jurnalistlərindən prokurorluğa şikayət etdi - AÇIQLAMA

"Sumqayıt" futbol klubunun prezidenti Riad Rəfiyev iki saytın rəhbəri, jurnalistlər Anar Şabanoğlu ilə İxtiyar Əsgərov haqda Baş Prokurorluğa şikayət edib. Həmkarlarımız prokurorluğa dəvət olunublar və izahatları alınıb.

Presssport.az xəbər verir ki, "Sports.az"-ın baş redaktoru Şabanoğlu ittihamı əsassız adlandırıb: "Riad Rəfiyev bizdən Baş Prokurluğa şikayət edib. Guya yazılarımızda onun şərəf və ləyaqətini alçaltmışıq, təhqir etmişik. Halbuki söhbət tənqiddən gedir. Bir yazı yox, bir neçə yazıda klubun və Rəfiyevin fəaliyyəti tənqid olunub. Məsələn, ötən mövsüm "Sumqayıt"ı hakimlərin "dartıb" avrokuboklara çıxartması haqda yazıdan şikayət olunub. Ancaq bu bir faktdır, həmin yazılarda bəhs edilən oyunların videoları var. O yazıda hər şey faktlarla yazılıb. Bundan başqa, digər yazıda klubun rəsmi mövqeyinin öyrənilməsinə baxmayaraq, yenə ittiham üçün əsas göstəriblər. Bildiyiniz kimi, İlqar Qurbanovla Riad Rəfiyev uşaqlıqdan dost olub. Amma İlqar "Sumqayıt"da olanda onun kartına külli miqdarda "qara pullar" köçürülməsi haqda söz-söhbət var. Buna görə İlqarla Riadın münasibətlıri korlanıb. Eyni maxinasiyanın "Sumqayıt"ın Yavər adlı sürücüsünün də başına gəldiyi deyilir. Yavər bəyin aztəminatlı ailədən olduğu və bir zamanlar sosial müavinət aldığı bildirilir. Amma belə bir adamın kartına fantastik məbləğ köçürüləndən sonra onun ailəsinə sosial müavinətin dayandırıldığı iddia edilir. Bu məsələlər haqda mediada daha əvvəllər də bəhs edilib. Amma nədənsə Riad indi "ayılıb", məsələni araşdırmaq istəyən, "Sumqayıt"dan rəsmi mövqe öyrənən bir saytın baş redaktorunu məhkəməyə verir. Daha doğrusu, məhkəməyə yox, prokurorluğa şikayət edir. Baş Purokurorluğa çağırmışdılar ki sizdən şikayət var tanış olun, izahatımızı aldılar". 

İxtiyar Əsgərov da rəhbəri olduğu "Matç.az"-da işıq üzü görən yazılarda təhqirdən söhbət getmədiyini vurğulayıb: "Rəfiyev saytda şərəf və ləyaqətinin aşağılandığını iddia edib. Halbuki şikayət edilən yazılarda heç bir məhkəmə predmeti, şərəf və ya ləyaqətin aşağılanması yoxdur. Məsələn, ötən mövsüm "Turan Tovuz" "Sumqayıt"a uduzdurulacaq?" sərlövhəli bir xəbərə görə şikayət olunub. Prokurorluq əməkdaşı soruşdu, bildirdim ki, yazının başlığı sual işarəsi ilə verilib. Qarşı tərəf bir yazıda "yarıtmaz fəaliyyət" ifadəsini şərəf və ləyaqətin aşağılanması kimi qələmə verib. Dedim əgər bu ifadədə təhqir varsa, istənilən cəzanı çəkməyə hazıram. Tələb edirlər ki, yazı silinsin və üzr istənilsin. Bildirdim ki, nə yazı silinəcək, nə də üzr istəyəcəyik".  

Həqiqətən "yarıtmaz" ifadəsində təhqir elementi yoxdur. Şikayəti, onun mətnini hazırlayan klub nümayəndəsi bunu bilməmiş deyil. Digər tərəfdən, həmkarlarımızdan İxtiyar Əsgərov sosial şəbəkə hesabında "Sumqayıt"ın mətbuat xidmətinin sözçüsü Zaur Xudiyevdən gileylənib. Məsələyə "Sumqayıt" tərəfinin də mövqeyini öyrəndik. Xudiyev ilk öncə "Matç.az" saytının rəhbərinin iddiası ilə razılaşmadığını bildirdi: "İxtiyar niyə elə yazıb, bilmirəm. Mən də onun bir statusa belə bir rəy yazdığını gördüm. Amma bu məsələ ilə bağlı mənim heç bir əlaqəm yoxdur, qətiyyən belə deyil. Mən bu çəkişmənin heç bir yerində yoxam. Jurnalistlərə qarşı bu iddianı Riad Rəfiyev qaldırıb. Mən sadəcə, klubun adından açıqlama verə bilərəm. Yəqin ki, İxtiyar səhv edib. Başqa heç bir şərh vermək istəmirəm. 

O ki qaldı klubun mövqeyinə, bununla bağlı rəsmi açıqlamamız var. Hüquqşünasımız tərəfindən hazırlanmış açıqlamadır. 

Barəsində Baş Prokurorluğa şikayət olunan jurnalistlər əməkdaşlıq və qarşılıqlı işbirliyi üçün “Sumqayıt” Futbol Klubuna müraciət edib, onların istəkləri ilə strategiyamız uyğun olmadığı üçün bu təklif rədd edilib. Sonra isə həmin jurnalistlər tərəfindən klub prezidenti Riad Rəfiyev barəsində mütəmadi olaraq, yalan, şər-böhtan xarakterli məlumatlar yazılır və tirajlanır. Komanda rəhbərinin şəxsi və işgüzar nüfuzuna, şərəf və ləyaqətinə, “Sumqayıt” Futbol Klubunun peşəkar fəaliyyətinə zərər vermək məqsədilə mütəmadi olaraq yazılan şər-böhtan xarakterli məlumatlar hüquq-mühafizə orqanlarına təqdim edilib. Bundan sonra iş müvafiq orqanların nəzarətindədir. Əminik ki, hüquq-mühafizə orqanları işə ədalətli və düzgün qiymət verəcəklər" (fanat.az).