"Qarabağ"ın rəqibi Vadjinin komandasını məğlub edib

Fransa Liqa-1-də 11-ci tura yekun vurulub.

Presssport.az xəbər verir ki, Avropa Liqasının Liqa mərhələsinin V turunda “Qarabağ”ın rəqibi olan “Lion” “Sent-Etyen”i qəbul edib.

Oyun meydan sahiblərinin 1:0 hesablı qələbəsi ilə yekunlaşıb. Yeganə qolu 29-cu dəqiqədə təcrübəli hücumçu Aleksandr Lyakazett vurub.

Maraqlıdı ki, görüşün iştirakçıları arasında “Qarabağ”ın sabiq hücumçusu İbrahima Vadji də olub. “Sent-Etyen”də çıxış edən 29 yaşlı seneqallı futbolçu 77-ci dəqiqədə oyuna daxil olub. 

Bu qələbədən sonra “Lion” 11 oyundan 18 xalla 5-ci yeri tutur. Lider PSJ-nin 29 xalı (11 oyun) var.

Xatırladaq ki, “Qarabağ”la “Lion” arasında matç noyabrın 28-də Tofiq Bəhramov adına Respublika stadionunda keçiriləcək.