Bəhlul Mustafazadə qələbə olmayandan sonra potensialı önəmsiz sayır: "Avropada uyğun komanda olsun ki, gedib tez də qayıtmayasan"

“Təəssüflər olsun ki, qələbə qazana bilmədik. Mütləq qalib gəlməli idik. Komanda şəklində məyusuq. Deyə biləcək çox şey yoxdu. Sadəcə olaraq çox çalışmaq, vəziyyəti düzəltmək lazımdı”.

Presssport.az  xəbər verir ki, bu fikirləri millimizin futbolçusu Bəhlul Mustafazadə Estoniya  yığması ilə UEFA Millətlər Liqasında Qəbələdə qolsuz bərabərliklə yekunlaşan matçdan sonra səsləndirib.

“Qarabağ”ın müdafiəçisi hazırkı millinin potensialı olduğunu, lakin daha çox çalışmaq lazım gəldiyini vurğulayıb:

"Qəbələ qazanmayandan sonra nə qədər potensial olmasının önəmi yoxdu. Kifayət qədər çalışmaq lazımdı. Futbolçular olaraq özümüzü daha çox inkişaf etdirməliyik. Avropaya uyğunlaşmaq lazımdı".

27 yaşlı Mustafazadə azərbaycanlı futbolçuların legioner həyatı yaşaması haqda da danışaraq, bunun üçün uyğun komandanın olmasının vacibliyini qeyd edib:

"Əlbəttə ki, Avropada çıxış etmək istəyirəm. Kimdən soruşsanız, hamının hədəfi budur. Deməklə də olmur. Uyğun komanda olsun ki, gedib tez də qayıtmayasan, ordan daha da irəli gedəsən".