Abasov "komandada hansısa sistemi otuzdurmuşuq" deməyi reallıqdan uzaq sayır: "Santuş küçədən gələn məşqçi deyil, Avropa çempionudu"

"Neftçi" Misli Premyer Liqasının 14-cü turunda doğma meydanda "Zirə"yə 2:1 hesabı ilə qalib gəlib.

Presssport.az xəbər verir ki, "ağ-qaralar"ın baş məşqçisi Samir Abasov oyundan sonra keçirilən mətbuat konfransında jurnalistlərin suallarını cavablandıraraq öncə oyunla bağlı danışıb.

- Futbolçularımı təbrik edirəm. Yaxşı əhval-ruhiyyə ilə çıxırıq oyundan. Ciddi və yaxşı rəqibə qarşı oynadıq. Oyunun içində də bizə əziyyət verdilər. Qələbələrə elə ehtiyacımız var ki, çox sevindik.

- Milli komanda neçə gündür ki, müzakirə olunur. Qapıda Mehdi Cənnətov yox, Rza Cəfərovun dayanması çox müzakirə edildi. Son məğlubiyyətdən sonra Fernandu Santuşun əvəz olumması ilə bağlı fikirlər səsləndirilir. Bu haqda fikirləriniz necədir?

- İsveçlə görüşdə Rza Cəfərov start heyətində idi. Çox üzüldük məğlubiyyətə görə. Bir neçə il bundan qabaq mən də millinin üzvü olmuşam. Belə məğlubiyyətlər bizim də başımıza gəlib. Nə yaşamışamsa, aşağı-yuxar bilirəm o futbolçular nə çəkir. Bu, bizim millidi. Hamımız səmimi qəlbdən üzüləcəyik. Udacağıqsa, hamımız səmimi olaraq sevinəcəyik. Belə olmalıdı. İstəmərəm ki, millidən qayıdan futbolçum suyu süzülmüş halda gəlsin. Xalqımız adına da üzücüdü - keçmiş olsun!Futbolçulara uğurlar arzulayıram. İnanıram ki, yaxşı işlər görüləcək. Bir baş məşqçi digər baş məşqçi haqda necə danışmalıdır? Bu gün həmin məşqçini millimizə gətiriblərsə, müqavilə imzalayıblarsa... Küçədən gələn məşqçi də deyil, Avropa çempionudu. Namizədləri gözdən keçirsəydik, Santuşun adını birinci deyərdik - ən azından təcrübəsinə görə. Azərbaycanlı da olsa, məşqçi haqda danışmaq istəmirəm. Etikadan kənardı.

- Millinin oyunlarından sonra ən çox təndiq olunan Ramil Şeydayev idi. Rza Cəfərov İsveçlə matçdan sonra psixoloji sarsıntı keçirib. Onları necə köklədiniz oyuna?

- Digərlərində görməyə bilərik. Amma demək olmaz ki, digərləri üzülmədi. Orda olan tərcüməşi Vüqar bizdə işləyir. O da danışır bizə, nə qədər üzülüblər. Kökləmək çox çətin idi. Bu məğlubiyyətdən sonra birə-beş işimiz artır. Futboldu, futbolçunun həyatında belə məğlubiyyətlər olacaq.

- Növbəti turda "Qarabağ"la oynayacaqsınızz. Qələbə "Neftçi"ni yenidən liqaya qaytara bilər?

- Bu gün çətin işə başlamışıq. Millidən danışırıqsa, belə şeylər bizim də başımıza gələ bilər. Dövrümdə tam formalaşmış komanda deyilik. Adımızı qaytarmaq üçün futbolçular və mən çox işləməliyik. "Qarabağ"la oyun gələn həftədi, hazırlaşacağıq. Azarkeşlər bizi bu gün necə dəstəklədilərsə, o oyunda da dəstəkləyəcklər. Onlar üçün də həmin matç çox vacibdi. Bundan da çətin oyunlar olacaq. 

- Bugünkü qələbədə əsas pay istək idi, yoxsa artıq istədiyiniz oyun sistemini görə bilirsiz?

- Faiz dərəcəsi ilə götürsək, istək öndə idi. Futbolçular da bir-birinə motivasiya verirdi. Hansısa oyunu “otuzdurmağ”ımızdan danışmaq reallıqdan uzaqdır. Faiz dərəcəsi ilə götürsək, bəlkə də 10 faizdəyik. Daha dinamik, oyuna diqtə edən tərəf olmalıyıq. Bu istək olmasa, işləyə bilməyəcəyik. Qələbənin açarı istək idi. Hansı ki, bu vaxta kimi bunun belə, əziyətini çəkirdik.