Murad Məmmədov "Neftçi"nin adını daha yaxşı yerlərdə təmsil etmək istəyir: "Hər saniyənin mənim üçün böyük dəyəri var"

Son dönəmlər “Neftçi”nin heyətində fərqlənən gənc yetirməsi Murad Məmmədov müsahibə verib.

Presssport.az 18 yaşlı yarımmüdafiəçinin müsahibəni təqdim edir:
- Cari mövsümdə ikinci qələbənizi qazandız. Bu oyunu necə şərh edərdin?
- Oyun əla idi. Hətta deyərdim bizim üstünlüyümüz şəraitində keçdi. Elə qələbəyə layiq biz idik. Hər oyun yaxşı oynayırıq. Sadəcə, epizodları dəyərləndirə bilmirik. Bu oyun yaxşı ki, epizodlari dəyərləndirərək qələbə qazandıq. Bu da bizim üçün motivasiyadı. İnşallah, növbəti oyunlara da qələbə üçün çıxacağıq. Mən də sevinirəm. Hər saniyənin mənim üçün böyük dəyəri var. Bacardığım qədər bu komandaya kömək etməyə çalışacam.
- Ötən oyun "Şamaxı”da qapısına qol vurmuşdun. Bu sənin üçün nə deməkdi?
- Bu özgüvən deməkdi. Qol vurmaq, assist eləmək insana daha da stimul verir. Çalışacam ki, hər dəfə bunu edim. Həm də bunu eləmək mənim borcumdu. Klub və azarkeşlər qarşısında bir məsuliyyətimdi. Elə də böyük dəyişiklik olduğunu deyə bilmərəm. Sadəcə, özgüvən gəldi.
- Artıq əvəzedicilərdən əsas komandaya keçmisən. Samir Abasovun sənə münasibəti necədi?
– Samir müəllim ilk növbədə böyüyümdü, hazırda onun başçılığı altındayam. Onun bütün qərarlarına çox hörmətlə yanaşıram. Münasibətimiz də çox yaxşıdı. Yəni ondan bir çox şeyləri görüb-gotürürəm. İnanıram ki, Samir müəllimin rəhbərliyi altında bu klub çox yaxşı yerlərə yüksələcək.
- Peşəkar karyeranda ilk addımlarını atırsan. Hədəfin nədi?
- Bu klub üçün əlimdən gələnin ən yaxşısınu etməyə çalışacam. "Neftçi"də oynamağın özü belə bir şərəfdi. Azərbaycanın flaqmanıdı. Mən bu komandada oynamaq üçün illərimi vermişəm, əziyyət çəkmişəm.
- Təbii ki, gənc futbolçu kimi təkliflərin olacaq. Xaricdən təklif gəlsə, nə cavab verərsən?
- Bu məsələləri daha çox menecerimlə danışır, məsləhətləşirəm. Qismət olsa, "Neftçi"nin adını daha yaxşı yerlərdə təmsil etmək istəyərəm. Bu klubun yetirməsi olaraq. Hazırda isə fikrim, arzum "Neftçi" ilə bağlıdı (Futbol+).