FİFA Fransa millisinin bilərəkdən uduzması şübhəsi ilə araşdırmalara başlayıb

FİFA Özbəkistanda keçirilən futzal üzrə dünya çempionatının qrup mərhələsinin III turunda Fransa yığmasının qəsdən uduzması şübhəsi ilə araşdırmalara başlayıb.

Presssport.az xəbər verir ki, İran millisinə 1:4 hesabı ilə məğlub olan fransızlar 1/8 finala qrup 2-cisi kimi yüksəlib.

Halbuki, “xoruzlar” bu görüşdə qalib gələrək qrup lideri kimi 1/8 finala adlasaydı və bu mərhələni də keçsəydi, 1/4 finalda dünya reytinqində 1-ci olan Braziliya ilə qarşılaşmalı olacaqdı. Turnir iştirakçılarının iddialarına görə, onlar İrana bilərəkdən uduzub.

Onu da bildirək ki, Fransa mundialın 1/8 finalında Tailandla qarşılaşacaq. İranın rəqibi isə Mərakeş millisi olacaq. Asiya təmsilçisi bu görüşdə qalib gələrsə, Braziliya ilə üz-üzə gələcək.