Bəhlul Mustafazadə: "Kiminsə "Qarabağ"dan getməyi böyük problem olmayacaq"

Azərbaycan Kubokunun 1/2 final mərhələsinin ilk oyunu çərçivəsində səfərdə “Neftçi”ni 4:0 hesabıyla məğlub etdikləri matçdan sonra “Qarabağ”ın futbolçusu Bəhlul Mustafazadə jurnalistlərin suallarını cavablandırıb. 

Presssport.az xəbər verir ki, millimizin müdafiəçi öncə qarşılaşmanı şərh edib.

- Oyuna yaxşı başladıq, ilk hissədə istədiyimiz qolları vurduq. Önəmli üstünlük əldə etdik. Təəssüf ki, ikinci hissədə tempi saxlaya bilmədik və qol epizodlarını qaçırdıq. Bu arenada "Neftçi"yə qarşı oynamaq hər zaman maraqlı olub.
- Qeyd etdiyin ki, tempi saxlaya bilmədiniz. Buna rəqib imkan vermədi, yoxsa komandada arxayınlıq yaranmışdı?
- Burda rəqibin də rolu var. Çünki hesabda geri düşdükdən sonra irəli atılmağa çalışdılar. Lakin tempi saxlamalı idik. Ümumi götürsək, nəticədən razıyıq. Gələn oyuna hazırlaşacağıq.

- Bu matçda belə hesab gözləyirdin?
- Hər oyuna maksimum güclə hazırlaşırıq. Əlimizdən gəldiyi qədər imkanlardan yararlanıb və çox qol burmağa çalışırıq. Bu gün eyni qaydada şanslarımızı dəyərləndirdik, qollar vurduq.
- "Neftçi"yə yazığınız gəlmədi?
- Derbidi, biz də onlar kimi qələbə qazanmaq istəyirik. Qarşımızdakı rəqibdən asılı olmayaraq əlimizə düşən qol epizodlarından yararlanıb, maksimum şəkildə qol vurmağa çalışırıq.
- İkinci oyun üçün özünüzü necə motivasiya edəcəksiniz?
- "Neftçi" ilə oyunlar hər zaman maraqlı olub. Düşünürəm ki, motivasiya baxımından çətinlik olmayacaq. Bu oyuna necə hazırlaşmışdıqsa, həmin qarşılaşmaya da eyni qaydada hazır olacağıq.
- Finalda "Qəbələ" və ya "Zirə" qarşılaşmağın fərqi var?
- Düşünürəm ki, yox. Çünki öz oyunumuzu oynayacağıq. Rəqibin kim olmasından asılı olmayaraq, hədəfimiz kuboku qazanmaqdı.
- Futbolçuların bir çoxu xarici klubların maraq dairəsindədir. Yayda onlar getsə, bizi necə "Qarabağ" gözləyir?
- "Qarabağ"da bu, davam edən prosesdi. Kiminsə komandadan getməyi böyük problem olmayacaq. Burda önəmli olan sistemdi və ona uyğun futbolçular tapılır. Əsas sistemi qoruyub saxlamaqdı.